Gant Isabelle Caignard emaomp en ur vilajenn deus Karnoed. Isabelle a ginnig atelierioù evit treuzkaz traoù d’an dud, da skouer penaos ober paneroù gant plantennoù glas, kutuilh gwinizh ha gwinizh du, ober bleud, fardañ bara ha krampouezh, pe c’hoazh liorzhañ hag implijout teknikoù evit mirout legumaj. Kinnig a ra meur a blant evit hon abadenn. Peseurt plantenn a vo hiriv ? An drez ! Selaouit ‘ta !
« Ur blantenn, un istor », grit anaoudegezh gant bed ar plant dre vouezh tud ar vro, kinniget gant Florie ! Ur gronikenn e Pikous Dibikous !
An atersadenn adskrivet :
(M’ho peus c’hoant skoazell Florie da adskrivañ gwelloc’h an atersadennoù, e vefe he laouen ! He fostel dezhi ‘zo : floriethielin@gmail.com. Mersi deoc’h !)
Adskivet gant sikour Gweltaz Duval-Guen
« Dibabet ‘m eus da gaozeal deus un drezenn, an drezenn. Beñ, plij a ra ar blantenn-se din abalamour zo ur bern traoù a zo moaien d’ober gant ganti, ha torr-penn eo a-wechoù ivez.
Neuze lâret e vez ba Bro-Dreger, ‘m eus adkerzhet eus Bro-Dreger, hag a lavare : « an drezenn daoubennek a ziskar al labastenneg ». Gouzout a rit, an drezenn zo staget deus an daou du. Daou benn en eus ha pa vez tapet an treid b’an drezenn neuze e kouezh an den evel-just. Neuze an drezenn daoubennek a ziskar al labastenneg. Se n’em gavet da dout an dud. Tout dud zo bet en em gavet-se pa oa o pourmen b’ar c’hoadoù, ha pa oa drez dre e dreid, eo kouezhet abalamour d’an drez. Ha kouezhañ war an drez n’eo ket gwall vrav, peogwir zo drez, zo spern warno. Ha n’eo ket brav bezañ flemmet gant an drez kwa.
A-hend-all, pezh zo brav gant an drez eo ar bleuñv, ar fleur, hag a zo kaer hardizh, ha mel… ar gwenan a blij ar fleur-se dezhe. Ha neuze pad tout an nevezamzer ez eont war ar fleur drez ha ba Breizh, ‘m eus aon, un hanter deus ar mel a zo graet gant pollen an drez. Pas ar pollen, n’eo ket, gant nektar kentoc’h kwa.
A-hend-all, pezh zo brav eo ar mouar, evel-just. Pa vez fleur ha pa vez ur bern gwenan, war-lerc’h zo bern mouar. Ha koñfitur mouar a zo mat-tre. Ha neuze ar mouar vez tapet, ba fin an hañv. Ha neuze zo moaien d’ober koñfitur peotramant d’ober « gelée », dre silañ anezhe, silañ koñfitur.
A-hend-all, pezh zo moaien d’ober gant an drez ivez eo panerioù. Ruskennoù vije graet gwechall, just a-walc’h evit ar gwenan. Neuze vije tapet ar bod drez, pezh oa hir ha hep re a brankennoù. Ha neuze e vije troc’het ha tennet tout ar spernioù. Ha war-lerc’h troc’het en pevar. Pevar zamm hed-ha-hed war an hirder kwa. Ha neuze vije evel lasoù, evel lêr kachimant. Ha zo moaien d’ober ur… da wriad anezhe, d’ober ruskennoù, ruskennoù gant plouz. Plouz ha drez.
Lâret e vez ivez a-raok ar forest, a-raok na vout gwez zo drez, ha war-lerc’h pa zo ur bern drez e teu koad bezv ha war-lerc’h tout ar c’hoadoù all. Hag e mod-se e teu ar forest. Neuze a-raok zo ur forest zo drez.
Sed aze pezh ma c’hoant da lâret deoc’h diwar an drez. »
Geriaoueg :
an drez = la ronce
Labastenneg = empoté
Ruskennoù = ruches
Spernioù = épines
